vendredi 7 septembre 2012

الحاجات اللّي ماينجموا يصيروا كان ليّا أنا

فبحيث ومن باب الحاجات اللّي ماينجموا يصيروا كان ليّا أنا، البارح في اللّيل جابوا للفوايي متاع حومتنا الجماعة اللّي خرجوهم بالقوّة العامّة من الدّيار في رواد... للّي مافيبالوش بالحكاية وقضيّة السنيت العباد هاذم خرجوهم ملاّكة من ديارهم على خاطرهم ماخلصوش الكرا، ياخي پريود الثّورة دارو منّا ومنّا لقاو ديار في رواد مازالوا ماكملوش تبناو ومايسكن فيهم حد، خلعوهم وسكنوا فيهم وقالوا ماليوم هاذم ديارنا... برّا يا زمان ويجا يا زمان الملاّكة الأصليّين متاع الدّيار هاذم يرفعوا قضيّة ويربحوها، يجي الحاكم للّي ساكنين يقوللهم شلاّڨاتكم وملاّڨاتكم و باي باي... إي عادا لخرين قالّك ألف وأعوذ بالله كان نخرجوا واحنا ماعنّاش ديار وباش نباتوا بصغارنا في الشّارع ودبشنا وموبيليتنا باش يتهلكوا وباش نتشردوا وتصرفوا ألقاولنا فين نسكنوا... اي برّا عاد الدّولة تلفتت منّا وتلفتت منّا مالقات بيها وين ولاّت كلمت الوالي متاعنا اللّي هو كلّم مولات الفوايي (برّا الله لا تربّحها) المرا سمعت اللّي هوما باش يبحبحوها والحاكم باش يخلّصها مليح مليح وفي إطار اللّي هي مرا ميتة شر عاد فرحت وقالتلهم وي وي بيان سوروتفاهموا باش يجيبولها 12 عايلة، ال 12عايلة هاذم كل وحدة 
كلمت أختها واللّي كلّم خوه واللّي كلّم ولد عمّه وولاّو ميا وڨفّة
الميا وڨفّة هاذم ماجاوش ييديهم فارغة، جابوا موبيليتهم، تلافزهم، حوايجهم، ماعونهم وكل مرّة كميونة تجي وأنا نقول هام باش يوفاو وشي.. والفوايي اللّي باش يسكنوا في مأثّث اي عاد ماينجموش يحطّوا فيه الطرناطة دبش اللّي جات ولاّو حطّو كل شي في الشّارع تي من غير مانزيد نوصفلكم، سوق الملاّاسين على حاله تنصب والنّهج سكروه من هوني ومن هوني وحد ما عندو الحق يتعدّا ونصبوا صالاتهم ونساهم (اللّي لكلهم منقبات ماشاء الله) وحلّوا كعبات بيرّة وسهريّة للصباح عياط وكلام زايد، هذا بالطبيعة بحضور الحاكم اللّي جابهم واللّي مفدّدنا أحنا بحميدة اللّي مايلزمناش نتعدّاو على أخلاقها أما سامح بتجاوزات كيف ماهاذي في كارتيي ريزيدونسيال

باش تفهموا فاش نقاسي أكثر حبّيت نقول اللّي بالنّسبة ليّا أنا ماهومش في الحومة بركا، على خاطر باب المبيت يعطي على باب الڨراج متاعنا دونك اليوم الصّباح كيف حبّيت نمشي نخدم على روحي مانجّمتش نخرّج الكرهبة على خاطر الموبيليا متاعهم متّكية على بابنا ياخي مشيت كيف الرّجّالة خذيت تاكسي وأنا في حالة غليان قصوى...
ربّي يستر لا كيف نروّح نلقاهم خرجوا أمّي مالدّار وولاّوا يسكنو فيها
وعلى راي جلال بريك وإنّها لثورة حتّى النّصر

4 commentaires:

  1. A quand la mise en vente libre des Kalachnikov :)

    RépondreSupprimer
    Réponses
    1. bah crois moi, je n attends que ça et eux n'ont pas besoin de ça :)))

      Supprimer
  2. ياخي الحاكم احنّ عليهم منّك؟ و الا مولات الفوايي عندها وطنية اكثر منّك؟ عيب عليك شيبي، كان جيت في بلاصتك راني فرّغتلهم القاراج حطّوا فيه موبيلياتهم، و طيبتلهم افّيّم جاري يبردوا بيه على قلوبهم مع طرف ثلج لدبيبسات العتاريس الّي بايتين ليلة قحط. حرام عليك، اما اش تحب تعمل؟ هاكي هي البورجوازيّة اللّي ما يتلقاش فيها الخير حتّى مع مسيكنات مظلومين ما عطاتهم الثّورة شيئ

    نصيحة خوذها منّي: سكّر الدّار مليح لا يشتهيك اخوك في الاسلام و ترصّيلنا في زوز شهود و عرس عرفي و نقعدوا من غير شيبي

    كثر الهمّ يخلّي الواحد قريب يطرشق

    RépondreSupprimer
    Réponses
    1. أخواتي في الإسلام بكلهم عندهم مكملاتهم، هو صحيح الشّرع يقول 4 مكملات أما مانجمش ناخو الريسك مع نساهم :))) صحيح شجاعة أما يلزم تشوفوهم باش تفهموني :)) برجوليّة مانكوّرش فرد كاتيڨوري معاهم جملة... تي الحاصل يا إيلوزيون كانك عالڨاراج ماتخافش تو يسربيو رواحهم وحدهم وكانك على كعبات البربر عندم ڨلاسيرات تبارك الله حاضرين

      Supprimer