نحبّك يا بلادي

بلادي كلمة حلوّة، بلادي نسمة صيف
بلادي مزيانة، بلادي زعبانة
بلادي مرا قويّة، بلادي راجل حنين
بلادي غناية، بلادي حكاية
بلادي الرّاجل اللّي حبّيتو
بلادي البو اللّي خسرتو
بلادي الأم اللّي نشكيلها
بلادي أختي اللّي نحكيلها
بلادي شمس نورها ساطع
بلادي فنار، بلادي ڨمرة ضوّاية
بلادي ضحكة رنّتها تسكّرني
بلادي يحبّوها ظلام، بلادي يحبّوا يفكّوها منّي
بلادي تخوّفهم بزهاها ويخوّفهم ضواها
بلادي ضوْها يكشف الأعوار
يحبّوها ظلام باش يتخبّاو
يحبّوها ظلام على خاطر قلوبهم ظلام
بلادي ترابها غالي، بلادي جنّة
ماتخافش يا بلادي ولادك مايسلموا فيك
ماتخافش يا بلادي دمّنا يزيد يضوّيك
دمّنا يزيد يعرّيهم، دمّنا منهم يحميك