lundi 3 juin 2013

مرت راجل

اليوم ولاّت مرت راجل... كل شي تبدّل في حياتها ماللّي ولاّت مرت راجل
اليوم ولاّت عبد، اليوم تمشي في الشّارع هازّة راسها، ما عاد شي يعيبها مادام ولاّت مرت راجل
قبل ما ياخوها الرّاجل كانت ناقصة، كانت تحشم بش تخرج، راسها ديما مطبّس، تستنّى باش تلقى سيدها اللّي بيه باش تولّي عبد... ولقاتو، ولاّت تمشي فرحانة وتستنّى في أوّل فرصة باش تتبسّم وتقول أنا ولّيت مرت راجل، وكان نهار واحد يقول كلمة حتّى من غير ما يقصد، تزرب تقلّو يزّي راني ولّيت مرت راجل
يعني قبل ما ياخوها الرّاجل، كان ينجّم أي حد يمرمدها ويسمّعها الكلام، آش بش تعمل ما عندها والي
البنيّة في دار عايلتها كيفها كيف الهم اللّي يهزّوه، حتّى تلقى مكتوبها وتشد دار راجلها وقتها يتهنّاوا ويرتاحوا... تعدّي حياتها وأمها تقوللها وقتاش تاخو راجل ونتهنّى عليك؟
عادي، العايلة ما تتهنّى على الطّفلة كان كيف تاخو راجل... آش يهمهم كان قرات ولاّ خدمت؟ آش بش تعمل بيها الخدمة، ما إيلها كان بش تاخو راجل وتجيب الصغار وتتلهى بدارها، هاذيكا هي خدمتها، هذاكا علاش خلقها ربّي... آش بش تعمللها ديپلومها وخدمتها؟

الطفلة في دار والديها تقلّق، تمرّض، والديها ديما يغزرولها متحيرين، أمها دمعتها محبوسة في عينها، بوها يدّو على قلبو، وقتاش تعرّس ويرتاحو منها... يمرجوها وهي تبدى تفركس في أي حكاية، ما عندهاش شروط، قابلة وراضية بكل شي المهم ترتاح مالستراس والمرج ومن سؤلات العايلة من نوع "آه فمّاش حويجة؟" تعبت من كلمة لا وتعبت من "أيّا اكبسلنا روحك عاد، بنات خالاتك وبنات عمّاتك محسوب الكلهم خذاوا وزيد إنت ماعاش صغيرة وقتاش بش تجيب الصّغار؟
اليوم خذات راجل... أنا عندي مديدة ماريتهاش وكيف ريتها وسإلتها على جديدها، تبسمت وقالتلي عرّست عندي توّا 6 شهر، باركتلها وقلتلها ربّي يهنّيك، سألتني "وإنت عرّستشي؟" قلتلها مازال، قالتلي "ربّي يخفّف مكتوبك وخيتي آما غير اكبس روحك ونقّص شويّة مالشّروط نعرفك صعيبة، وقيّت راهو فاش تستنّى؟" تبسّمت وما جاوبتهاش وقلتلها اللّي يلزمني نمشي

اليوم نسإل في روحي... ياخي المرا بلاش راجل ما تسوى شي؟ ماهيش إنسان كامل؟ أنا ما تربّيتش هكّا وعمري ما ستانست بالكلام هذا... أنا تربّيت على مخّك في قرايتك باش تلقى أحسن خدمة وتضمن مستقبلك وما تستحق لحد... كبرت ولقيت روحي في مجتمع ما نجمش يفهم كيفاش عمري 30 سنة ومازلت ما عرّستش
كنت مالأول نفسّر ونقول اللّي أنا مانيش ضد العرس واللّي الستابيليتي باهية واللّي في أي رولاسيون باش تكون ستابل يلزم فما حب وتفاهم وبرشا حاجات أخرى ياخي لقيت اللّي لعباد ماهيش فاهمة أصلا فاش نخرّف... اليوم ولّيت نقول لا مازال ونسكت ونعمل روحي نسمع فيهم وأنا نتبسملهم، زايد بش نسمع فاش يقولوا، كلامهم حفضتو
وزيد زايد كلامي توّا مادامني مازلت مانيش مرت راجل