الكلام في موضوع هكّا صعيب... الكلام في قضيّة اغتصاب صعيب وكيف تبدى الضّحيّة طفلة صغيرة أصعب أكثر... ماهوش تقليل ماللّي تنجّم تحسّوا المرأة كيف يغتصبوها آما كيف تبدى الضّحيّة عمرها 3 سنين ماعادش نلقى الكلام باش نوصف آش نحس...
هذاكا علاش اخترت باش ما نحكيش في الموضوع هذا بالذّات أو بالأحرى مانحكيش عالضحيّة وآش باش تقاسي هي بدرجة أولى وزيد والديها زادة... بالنّسبة ليّا أنا كريمة ماتت نهارتها وتخلقت كريمة جديدة، كريمة جديدة اللّي تفاصيل جريمة كيف ما هاذي باش تقعدلها في مخها حياتها الكل، بكل تفاصيلها...
اليوم نحب نحكي على مجتمع كان بطريقة أو بأخرى شريك في الجريمة هاذي... مجتمع تونسي، مجتمع عربي فاسد، جعل أولى أولويّاتو وكل قضاياه متعلقة بالنكاح... مجتمع يحب يغطّي المرأة ويلغيها باش ما تثيرش الرّاجل ووصل حتّى البنيّات الصغار يغطّيهم باش مايثيروش الرجال ووصلنا سمعنا حتّى حكايات من نوع الرّاجل الوسيم برشا مايلزموش يقعد وحدو مع راجل آخر على خاطر ينجّم يثيرلو شهواتو... مجتمع عربي فاسد كل حياتو مختصرة في النّكاح وخلاّت الرجال تولّي حيوانات، أقل حتّى مالحيوانات على خاطر عمري ماريت هايشة تغتصب في هايشة أخرى ولا تقربلها جملة وهي صغيرة
مجتمع فاسد وشعوب مرهزة حتّى كيف تكتب كتب الكلهم يصبّوا في نفس المصب والكلهم يحكيوا على المضاجعة والنكاح والمرأة اللّي هي مجرّد وسيلة متعة وماكينة متاع صغار وخطر كبير على الرّاجل على خاطر وجودها في حد ذاتو مايخلّيهش يتحكّم في روحو...
إينيرجي ضايعة وملاين بالهم باش يلقاوا حلول كيفاش يعملوا نيكة في الحلال... هاو زواج عرفي، هاو زواج متعة، هاو مفاخضة الرّضيع هاو إرضاع الكبير... ناس حارمة روحها بدون إقتناع حقيقي خلاّهم يولّيوا مكبوتين وحياتهم الكل منحصرة في كيفاش يرضيو شهواتهم بما لا يخالف شرع اللّه لين بدعوا شرع جديد ودين جديد ورب جديد...
وبالطبيعة، المرأة، حطبة جهنّم، أكثر سكّان النّار، الكائن الشّيطاني اللّي يحب يمنعهم مالدخول للجنّة كيف ما حوّاء حرمت آدم مالجّنّة... الوسواس الخنّاس سبب البلا، اللّي مجرّد وجوده يهدّد الحياة البشريّة... المرأة هاذي مادامي موجودة ومنّجموش نمنعوا وجودها وزيد نستحقّوها لبضع دقائق باش انّحّيوا الكبت متاعنا، المفيد مادام منّجموش نلغيوها يلزمنا نغطّيوها، نخبّيوها على خاطر ضعف الرّاجل عادي، غرائزو الحيوانيّة عاديّة، الهوس متاعو عادي... ربّي خلقو هكّا والمرا ربّي خالقها باش يمتحن بيها الرّاجل... حتّى لو كانت بنت 3 سنين...
وين عايشين ياخي؟ آشنوّة هالعالم القذر هذا؟ آشنيّا هالمجتمع المقرف هذا؟؟؟ هاذي خير أمّة أخرجت للنّاس؟؟ هاذي هي شريعتكم اللّي باش تحل المشاكل الكل؟؟؟
سمعت حقوقيّين فسرولنا مشكورين اللّي الحل ماهوش حكم الإعدام على خاطر الدّول اللّي يطّبّق فيها حكم الإعدام فيها أكثر جرائم مالنّوع هذا وأنا شخصيّا موافقتهم آما موش لنفس الأسباب ولو إنّي لحد أيّامات التالي كنت مقتنعة بالأسباب هاذي آما اليوم وبعد ما سمعت الطّفلة الصّغيرة تحكي ببراءة وعفويّة عالرّاجل اللّي اغتصبها إقتنعت اللّي الإعدام ماهوش حل على خاطر الموت راحة مايستحقهاش جرثومة إغتصب طفلة عمرها 3 سنين من قدّام ومن تالي... الجرثومة هاذي يلزمها تتعذّب مدى الحياة بأشنع الوسائل... نعرف اللّي برشا معارضينّي في الحكاية هاذي آما اليوم وبعد ماتفرّجت في الطّفلة، آمنت اللّي حقوق الإنسان ماتتعطى كان للإنسان وحد ما ينجّم يقنعني اللّي الشيء هذاكا إنسان...
وزيد واحد يجي باش يختم النّص يطيح بحكاية هكّا في الفايسبوك
يعني كنت نعرف اللّي الطحين يرضعوا فيه برشا توانسة مالبزّولة آما باش توصل لهكّا؟؟؟ ماهذا؟؟؟ وعلى كل ما كنتش ناوية نحكي على وزيرة الجبن ومانيش باش نحكي عليها على خاطرها أقل ماللّي واحد يخسر عليها حرف
نص يعبر على الوجيعة اللي في كل واحد حر في هالبلاد. نص صادق وغاضب وكاشف لكنها الحقيقة
RépondreSupprimerشكرا على هذه التدوينة
Merci Mon ami,
SupprimerUn sujet pareil ne peut qu'être écrit avec le coeur... d'ailleurs pour moi l'écriture en général est une question de tripes... c'est pour ça que je dis que pour connaître une personne il faut lui lire, on ne peut pas mentir en écrivant et si on le fait, on est vite démasqué...
Article qui frappe au plus juste, sur la dérive du pays, la frustration et la bêtise ambiante.
RépondreSupprimerToutefois, je pense que le viol de la petite n'a rien à voir avec la frustration globale qui touche les tunisiens, mais avec la pédophilie, c'est à dire une perversion.
On mettrait ce type dans un harem, il resterait pédophile.
Mais bon, ce type de criminels n'est pas dangereux pour nos gouvernants, vus qu'ils les libèrent à tour de bras ( libération notamment du frère du ministre de l'a justice, incarcéré pour des faits similaires commis sur un garcon de 8 ans)
Je suis d'accord sur le fait qu'il s'agit d'une perversion et que la pédophilie n'est pas dû à la frustration, la preuve c'est que ce phénomène existe partout... ceci dit, je pense et je suis convaincue qu'une société à qui on inculque que la femme est un objet qui ne sert qu'à satisfaire les désirs de l'homme, que la femme même enfant (on a tout de même des mariages pédophiles halal) est sujette au désir alors même si ça ne crée pas la pédophilie, ce comportement nourrit la perversion en question...
Supprimerتوة كلامك صحيح في كون بعض المخلوقات لم ترتق بعد لمرتبة الإنسان باش نحكيو معاهم بلغة حقوق الإنسان ..أما من جهة أخرى يولّي تغييب للمنطق كي نطالبو بتعذيب إنسان لا لسبب أنو عذّب إنسان آخر.. ونرفضو أن نرتقي بإنسانيتنا خاطر الجاني تخلّى على على إنسانيتو قدام بنية صغيرة
RépondreSupprimerتحقيق العدالة ما يجيش بتطبيق العنف والعقوبات البدنية هذا كان نهار نحبو على مجتمع تسود فيه ثقافة حضارية تُعلي من شأن الإنسان.. ما عدى ذلك نصك مزيان
يا دوڢيتش نعرف والله نعرف ولليوم نقول اللي الدّولة لا يلزمها تطبّق عنف لا يلزمها تستعمل العقوبات الجسديّة... آما اللّي كتب النّص هذا ماهيش الدّولة وماهوش باسم الدّولة.. اللّي كتب النّص هذا مرا تونسيّة من أكثر ما يوجعها هو وضعيّة المرأة والصّغار... اللّي كتب النّص هذا مرا تونسيّة يمكن غدوة تولّي عندها بنيّة... اللّي كتب النّص هذا مرا تونسيّة تفقد عقلها كيف تصير حكاية هكّا ويمكن نشوكيك أكثر كيف نقول اللّي أنا منبهرة بقوّة أم الطفلة اللّي مشات شكات على خاطر أنا في بلاصتها ما نشكيش للبوليسيّة جملا
Supprimerكلامي مش معقول يمكن وهذاكا علاش ما نكتبش برشا في الموضوع هذا على خطر كيف نكتب عمري ما كتبت بعقلي
دوڢيتش نصّي مزيان باهي آما وقتاش نقراولك إنت؟؟ عندك مديدة صديقي واشتقنا لكتاباتك :)
Supprimerعيشك صديقتي :)
Supprimerمديدة بالفعل... توحشت هذا الفضاء